مقولة أمنية يمكن تصديقها على الإطلاق لكن التلفيق يحول بيننا وبين ذلك فمن الممكن ان يفتعل أحد موقفا يهدف بذلك لإثارة الخلاف والشكوك بين طرفين يريد أن يتخلص منهما وعلى هذا الأساس دار الحوار التالى على أسس معلومة أو علمت بيقين بعد ثورة 25 يناير خاصة وأن هناك فلول مازالت متعاطفة بالكلية مع رأس النظام الفاسد الظالم المستبد الذى استولى على مصر ولا أقول حكم المصريين طوال عشرات السنيين الماضية وهو مازال منتشر فى كل مكان حتى فى مستشفى المركز الطبى الدولى الذى سمح به مبارك للقوات الأمريكية أثناء حرب الخليج فهو مستشفى أمريكى النشأة والهوى !
دخل الفل صاحب الرتبة العليا صباح يوم الأحد بعد أحداث ماسبيرو يقول له : شفت يا ريس ايه اللى حصل امبارح ! المخلوع يرد : يستاهلوا اللى يجرا لهم عشان يعرفوا قيمتى ! الفل : ياريس ده الجيش ضرب نار عليهم لأول مرة فى تاريخه
المخلوع : لأ مش معقول الجيش ملهوش فى الكلام ده ولو عندهم رغبة فى كده كانوا ضربوا يوم 28 يناير لألأ مش مصدق
الفل : ماهم زودوها برضه ياريس قبض على كل رجالتك ومحاكمات وأحكام ومش عارفين الجى ايه! المخلوع : متنساش أن إحنا برضه هنا وفى طرة وبره الأمور ماشية كويس ولا فيه أدلة ولا أحكام ! وكل ماتطول العملية وينشغل الشعب ده بنفسه ربنا حايفرجها لأنه كفاية أنا تعبت بقى من شعب خدمناه بكل إخلاص وبعدين غضب علينا غضبا لم أتوقعه ! الفل : لكن الانتخابات البرلمانية على الأبواب ولو اتعملت صح ده حيأكد حجم الفساد والتزوير اللى ناس كانت عايشه فيه وده مش فى صالحك ياريس ! المخلوع : ياعم اصبر انت مستعجل ليه كده انتخابات ايه ! التقيل جاى ورا وبعدين ماسبيرو دى كانت بروفة زى ما وصلنى من أحبابى المخلصين ! استقرار البلد دى معناه نهاية سيئة لينا كلنا لأن كده احنا كنا عاملين استقرار لنا بس ولوجودنا فى الحكم ولو أخدت السلطة التشريعية والقضائية استقلالها الحقيقى سوف يبدأ الحساب بجد وكل الهنا اللى احنا فيه حايروح وساعتها نعتبر الثورة نجحت !
الفل : طب ياريس ماتقولى ايه اللى حايحصل ونورنى دا انا برضه بتاعك. المخلوع : لا خليك تقيل انت مش شايف انا لسة نايم على السرير لحد دلوقت لأنى قعدتى فى القفص إهانة لكن وانا ممدد أهو شئ من التعاطف مطلوب مع المريض فى محاكمته يعنى الصبر حلو وهو اللى بيحصل من مناوشات واتهامات وتخوين بين الأحزاب والرموز والائتلافات يقطع جسور ويولد شكوك وممكن يتحول لصراعات تصب فى مصلحتنا ! الفل : على رايك ياريس دلوقت الخناقات شغالة النهاردة على البرلمان بكرة على الوزارة ويتلخبط المخلص على النصاب على رجالتنا فى وسطهم ونطلع جنبهم ملايكة الله ينور عليك ياريس استاذ استاذ المخلوع : قول الحمدلله لما صدر حكم الحكمة بحل الحزب الوطنى لم يتضمن عزل وحرمان قياداته من العمل السياسى كما حدث فى تونس وده ادانا فرصة لتكوين عشرة احزاب على الأقل من رجالتنا والدنيا ماشية براحة وكل تأخيرة وفيها خيرة !
دخلت سوزان : ايه الكلام ده كله مش قلت بلاش نتعب الريس وكفاية اللى هو فيه الفل: ياهانم الريس زى الفل احنا بس كنا بنحكى على اللى حصل امبارح المخلوعة : ده يوم عظيم لكن نفسهم كان قصير وعلى الله يستمروا شوية لحد ما نلاقى رد فعل خارجى قوى يوقف الثورة دى عند حدها المخلوع : يا سوزى الوقت قدامنا وبرضه مش عايزين نحرج حد معانا أو نكشفه ! المخلوعة : انت طول عمرك كده تصدق كل اللى يتقالك الموضوع أكبر لأن الاسلاميين ما ظهروش خالص ولا حد عرف يجرجرهم لأنك عارف المطلوب فتنة مسلمين ومسيحيين مش جيش وأقباط !! الله يمسيك بالخير يا عادلى !
الفل: ماهو إعلامنا ورجالتنا فى القنوات الفضائية عاملوا شغل كويس وولعوا الدنيا ضد الجيش اللى ممكن يتلم شوية ويتصدر الاسلاميين لمواجهة تحركات تانية ! المخلوع : ايوه بس خاللى بالكم من المحاولات اللى بتم لحل مشاكل الأقباط اليومين دول وكده يبقى مفيش مبرر لأى تحركات يمكن نوظفها لصالحنا بعد كده ! المخلوعة : اطمن مش حا يقدروا يحلوا حاجة لأن كل محاولة للحل سيقابلها رفع لسقف الطلبات وهنا ستقف المحاولة لحين تشكيل برلمان الثورة بتاعهم وقبل كده ممكن رجالتنا يعملوا حاجة ! المخلوع : تفتكر رجالتنا اللى كلوا حلاوة وبقلاوة معانا على نفس الإخلاص والتأييد لينا لحد دلوقت ولا اليأس بيدب فى قلوبهم يوم بعد يوم الفل: عيب ياريس ده لحم كتافهم من خيرك ودلعك فيهم ثلاثين سنة وهم برضه لسه مسيطرين على المفاصل فى البلد مال واستثمار واعلام ومناصب رئيسية فى البلد وكل واحد بيحاول فى مكانه يقوم بدوره فى محاولة لتيئييس الشعب الجاحد ده من ثورته والدعاء ليك ولأيامك ياريس !
المخلوعة : المهم دلوقت انا مسافرة قريب للندن لمتابعة كم حاجة كده بعد ما رفعوا اسمى من الممنوعين من السفر وزرت الأولاد فى طرة وكان معايا سكرتيرك الخاص واتفقنا على كم حاجة مستعجلة قبل الانتخابات ما تبدأ انت مش عايز حاجة من لندن ؟ المخلوع : نفس أروح بلد الاكسلانسات من غير رسميات وحشنى السفر واللف على الحبايب على العموم ماتنسيش تسلميلى على ممدوح اسماعيل وتبلغيه أن دخوله المجال الإعلامى أحسن خدمة يقدمها لنا دلوقت وما لهوش دعوة بدعم الأحزاب فى مصر، البركة فى الرجالة هنا عاملين الواجب وأكتر زى ما بيوصللى . الفل : ياريس أخر أخبار الإخوان والسلفيين ....
المخلوع : يادى الغم ياسيدى ماحبش اسمع سيرتهم انا عايز خبرهم ! الفل : ماهم وقعوا فى بعض لما حس كل واحد بأنه الأقوى وأن وجوده لازم يترجم لمقاعد فى المجلس وده كويس عايزينهم كلهم رؤوس وأساتذة يخبطوا فى بعض وكده ماحدش منهم يسيطر على المجلس يعنى لو تمت الانتخابات . المخلوع : مين اللى بدأ الخناق ؟ الفل: تفرق يعنى ياريس !. المخلوع : طبعا تفرق . الفل: السلفيين طلبوا مقاعد كثيرة وشعروا أنهم أقوى فى الشارع وبدأت الحرب الإعلامية ضد الإخوان ، والإخوان مع كده بيردوش ومستمرين فى عملهم . المخلوع : أهو ده الخوف فاكر برنامج اسمه ايه عبد السميع ده ، نزل شتيمة فى الإخوان من غير حد يدافع أو يرد فكسبوا شعبية أكتر وده ممكن يحصل لو استمر الحال يزداد التعاطف مع الإخوان بخبرتهم ويقل مؤيدين السلفيين وهم لسه جداد فى العمل السياسى ! لكن على كل حال الشحن ضدهم كلهم وتشويه صورتهم وتحريض الناس عليهم يصب فى خانتنا لأن الناس دى لو جت ونجحت فى حل مشكلات البلد يبقى فعلا قدام الناس حنكون خونة وحرامية ودى مش لازم يحصل أبدا مهما كان التمن فاهم يا فل ..... فاهم يا مخلوع !!! انتهى
الخلاصة أن وحدة المصريين وتوافقهم وزيادة حجم الثقة المتبادلة بينهم دون أى تفرقة هى الحل لنجاح الثورة واستكمال أهدافها دون اتهامات أو تخوين أو فقدان للتواصل الدائم بينهم وأن تجاوز المرحلة الانتقالية بجدول زمنى محدد هى السبيل الوحيد لاقتصاص المصريين من الظلمة المفسدين المحبوس منهم والمسئول حتى الآن ! فاللهم وحد صف المصريين وقوى إرادتهم وانفخ فى صورتهم ومكنهم ممن ظلمهم وأذلهم ونهب ثرواتهم وجرف قيمهم وضيع أخلاقهم اللهم آمين
دكتور محمد جمال حشمت
17 أكتوبر 2011م